ပညာရေး အရည်အသွေး အကဲဖြတ်ခြင်း(Assessment)

ပညာရေးရဲ့ လေ့ကျင့်ပျိုးထောင်မှုအတွင်းမှာ ပြဿနာအရှိဆုံးအရာကို ပြပါဆိုရင် ကျောင်းသားရဲ့ အရည်အသွေး အကဲဖြတ်ပုံ ဖြစ်တယ်လို့ဆိုရမယ်။ ပညာရေးစနစ်က ကျောင်းသားတွေရဲ့ စွမ်းဆောင်နိုင်ရည်ကို ကြည့်ပြီး အရည်အသွေးကို အကဲဖြတ်ထုတ်ဖော်ပေးရတယ်။ ထုတ်ဖော်တဲ့ ပုံစံအမျိုးမျိုးလေး ရှိတယ်။

ကျွန်တော်တို့ ဆီမှာ အထင်အရှားတွေ့ရတဲ့ အရည်အသွေးအကဲဖြတ်ပုံကတော့ စာမေးပွဲစစ်ပြီး အမှတ်ပေးခြင်းပါပဲ။ ဒါပေမယ့် စာမေးပွဲစစ်ခြင်းနဲ့ အရည်အသွေးအကဲဖြတ်ခြင်းမှာ အမြဲတမ်းချို့ယွင်းချက်တွေရှိနေတယ်ဆိုတာလောက်တော့ သိထားရပါမယ်။ အဲဒီလို သိထားမှလည်း ကိုယ့်ရဲ့ စာမေးပွဲစစ်ခြင်းနဲ့ အမှတ်ပေးခြင်းမှာ လွဲမှားနေတဲ့ အရာတွေကို အမြဲလေ့လာပြင်ဆင်နိုင်မှာ ဖြစ်တယ်။

တစ်ခါက ကျွန်တော်တို့ရဲ့ ကဗျာစာဆိုက၀ိတစ်ဦး ဖြစ်တဲ့ မင်းသုဝဏ်ဟာ အိုင်အေတန်းကို တတ်နေပါတယ်။ ဒီအချိန်မှာ သူ့ကို မြန်မာစာ စာစီစာကုံးသင်ပေးတဲ့ ဆရာက ဇော်ဂျီပါပဲ။ ဇော်ဂျီရေးခိုင်းတဲ့ စာစီစာကုံးခေါင်းစဉ်တွေက ကျွန်တော့်အမြင်ဆိုရရင် ယနေ့ တက္ကသိုလ်ဝင်တန်းစာမေးပွဲတွေမှာတွေ့ရတဲ့ စာစီစာကုံးတွေလို မဟုတ်ဘဲ အနောက်တိုင်း အဆင့်မှီပြီး အဆင့်အတန်းမြင့်မားတယ်လို့ ဆိုရမယ်။

ယနေ့တက္ကသိုလ်ဝင်တန်း မှာတွေ့ရတဲ့ စာစီစာကုံးတွေက ‘အလိမ္မာစာမှာရှိ၊ တစ်နေ့တစ်လံ ပုဂံဘယ်ရွေ့မလဲ’ လို စကားပုံဖြစ်ချင်ဖြစ်၊ မဖြစ်ရင် ‘နေသာသောနေ့၊ ကျွန်ုပ်ကြိုက်နှစ်သက်သော စာအုပ်တစ်အုပ်’ လိုမျိုး သမာရိုးကျ စာစီစာကုံးတွေပါပဲ။

ဇော်ဂျီက သူ့ရဲ့ စာသင်ခန်းထဲဝင်လာပြီး 'မိုးရေထဲကကြောင်ကလေး' ဆိုတဲ့ ခေါင်းစဉ်နဲ့ စာစီစာကုံးရေးခိုင်းပါတယ်။ ပြီးတော့ အခြားအကြောင်းအရာ နှစ်ခုလည်းပေးပြီး ခေါင်းစဉ်သုံးခုကို စိတ်ကူးပေါ်သလို ရေးခိုင်းတယ်။ မင်းသုဝဏ်ရေးတဲ့ စာစီစာကုံးဟာ ၁၀ မှတ်မှာ ၉ မှတ် ရပါတယ်။

ဒီနေရာမှာ ၀င်လာတာက ကျောင်းသားရဲ့ အရည်အသွေးအကဲဖြတ်ဖို့အတွက် အမှတ်ပေးခြင်းပါပဲ။ ဒီအမှတ်ဟာ တကယ်ပဲ မင်းသုဝဏ်ရဲ့ အရေးအသားကို အကဲဖြတ်နိုင်တဲ့ အမှတ်လား။ ဘာကြောင့် ဇော်ဂျီက မင်းသုဝဏ်ရဲ့ အမှတ်တစ်မှတ်ကို လျော့ထားရပါသလဲ။ မင်းသုဝဏ်ရဲ့ စာစီစာကုံးဟာ အမှတ်တစ်မှတ် လျော့ဖို့ လိုအပ်နေသလား။ ကျောင်းသားတစ်ယောက်ရဲ့ အရည်အသွေးကို ဆရာက အကဲဖြတ်ခြင်းဟာ ဆရာရဲ့ သြဇာအာဏာ ပေါ်ကိုသာ မှီခိုနေရတာမျိုးဖြစ်မနေဘူးလား။

ယနေ့ကျွန်တော်တို့ရဲ့ ကျောင်းတွေမှာ ကျောင်းသားတွေ အပေါ် မြန်မာစာ စာစီစာကုံး၊ အင်္ဂလိပ်စာ အက်ဆေးနဲ့ ပတ်သတ်ပြီး အမှတ်ပေးပုံဟာ ပိုလို့တောင်မှ ဆိုးနေသေးတယ်။ မြန်မာစာ စာစီစာကုံးအမှတ် ၂၀ မှာ အမှတ်၂၀ အပြည့်ရတဲ့သူဆိုတာ မရှိဘူး၊ အကောင်းဆုံးရေးနိုင်သူကို ၁၄မှတ် ဒါမှမြန်မာတစ်နိုင်ငံလုံး မြန်မာစာ အမှတ်အများဆုံးရလောက်တဲ့သူမျိုးဆို ၁၆ မှတ်လောက်သာ ပေးတတ်တယ်။

ဒီနေရာမှာ ကျွန်တော်တို့ မေးရမှာက ကျောင်းသားရဲ့ အရည်အသွေးကို စာမေးပွဲ မဖြေခင်ကတည်း လေးမှတ်လျော့ချဖို့ အကဲဖြတ်ထားတဲ့ အမှတ်ပေးပုံဟာ တရားမျှတတယ်လို့ ဆိုနိုင်ပါ့မလား ဆိုတာပဲ။

ပညာရေးအတွင်မှာ အရည်အသွေးအကဲဖြတ်ပုံဟာ တကယ်ပဲ အရည်အသွေးကို အကဲဖြတ်ထုတ်ဖော်ပြနိုင်တဲ့ ပုံစံဟုတ်မဟုတ်ကို အမြဲစဉ်းစားနေသင့်တယ်။ အရည်အသွေးအကဲဖြတ်ပုံကို စာမေးပွဲစစ်ဆေးခြင်းသာမက ပညာရေးတစ်ခုလုံးအတွင်းက နေရာတော်တော်များများမှာ ပုံစံအမျိုးမျိုးနဲ့ ထားသင့်တယ်လို့တောင်မှ ဆိုကြတယ်။ နေရာ တော်တော်များများမှာ ထားသင့်တယ်လို့ ဆိုရင်တောင်မှ ဘယ်လိုပုံစံမျိုးနဲ့ ထားသင့်သလဲ ဆိုတာမှာလည်း အငြင်းပွားဖွယ် ရာတွေပြည့်နှက်နေတယ်။

ကျွန်တော် ပြောချင်တာ ပြဿနာတွေ အများကြီးရှိနေတဲ့ အရည်အသွေးအကဲဖြတ်ခြင်းလို အရာမျိုးအတွက် တရားမျှတမှုရှိအောင် ကျွန်တော်တို့စဉ်းစားပြီး ကြိုးစားလုပ်ကိုင်ရမယ့် အရာတွေ အများကြီး ကျန်သေးတယ်။ အဲဒီလို အရေးတကြီးလုပ်ကိုင်ရမယ့် အချိန်မှာ အရည်အသွေး ထုတ်ဖော် အကဲဖြတ်ရာမှာ ကျောင်းသားတွေ စာမေးပွဲမဖြေခင်ကတည်းက အမှတ်တွေ လျော့ထားတဲ့ အရည်အသွေး အကဲဖြတ်ပုံစံမျိုးဟာ မဖြစ်သင့်ဘူး ဆိုတာပဲ။

တစ်ချို့ပညာရေးသီအိုရီပညာရှင်တွေဆိုရင် ပညာရေးအတွင်းကနေ အရည်အသွေးအကဲဖြတ်ခြင်းကို ဖျက်သိမ်းသင့်တယ်လို့တောင်မှ အကြံဥာဏ်ပေးနေတာကိုတွေ့ရမယ်။ ပညာရှင် ‘လာနား’ ဆိုရင် တက္ကသိုလ်တွေမှာ အရည်အသွေး အကဲဖြတ်ခြင်း မရှိဘဲ အလုပ်လုပ်သင့်တယ်လို့ ဆိုတယ်။ အဲဒီနောက် deschooling ဆိုတာပေါ်လာတယ် ။ ကျောင်းတွေ မှာ စာမသင်တော့ဘဲ အိမ်မှာ စာသင်ပြီးမှနေတာပဲ။

ဒါပေမယ့် ပညာရေးမှာ သင်ကြားခြင်းနဲ့ သင်ယူခြင်းဆိုတာပါနေတဲ့ အတွက် စာမေးပွဲစစ်ခြင်းနဲ့ အရည်အသွေးအကဲဖြတ်ခြင်းလို အရာမျိုးက မဖြစ်မနေပါနေတာပဲ။ ကျောင်းရဲ့ အားကစားလုပ်မှု ၊ လူမှုရေးလုပ်ဆောင်မှု၊ ကျောင်းအသင်းအဖွဲ့တွေမှာ ပါဝင်လုပ်ဆောင်မှုတွေအတွက် အမှတ်တွေကို Deschoolers (၀ါ) ကျောင်းဆန့်ကျင်ရေးဝါဒီတွေ ပြောသလို မလိုအပ်ရင်တောင်မှ သင်ကြားခြင်းနဲ့ သင်ယူမှုရှိနေသမျှကာလာပတ်လုံး အရည်အသွေးအကဲဖြတ်ခြင်းကတော့ ရှိနေမှာပဲ။ တနည်းအားဖြင့် သင်ကြားမှုနဲ့ သင်ယူမှုဖြစ်စဉ်ကြီးဟာ ဘယ်လောက်ထိအောင်မြင်သလဲ ထိရောက်သလဲကို ပြန်စမ်းစစ်ပေးရတဲ့ သဘောရှိတာတော့ အမှန်ပဲ။

ကျောင်းဆန့်ကျင်ရေးဝါဒီတွေရဲ့အမြင်မှာ နားလည်မှုလွဲနေတာက ကျောင်းအတွင်းအရည်အသွေး အကဲဖြတ်ခြင်းဟာ ပုံစံအမျိုးမျိုး ရှိနေနိုင်တယ်ဆိုတာပဲ။ ဘာရိုးက အဓိက ပုံစံလေးမျုိးကို ထုတ်ပြတယ်။

ပထမတစ်ခုက ကျောင်းသားရဲ့ စွမ်းဆောင်ရည်ကို ပုံစံအမျိုးမျိုး နည်းလမ်းအမျိုးမျိုးအရ ကြည့်ပြီး အဆင့်သတ်မှတ်ပေးတာပဲ။ ဒုတိယတစ်ခုက အခြေခံအရည်အသွေးရှိကြောင်းလက်မှတ်ထုတ်ပေးတာပဲ။ ဘွဲ့လက်မှတ်၊ အောင်လက်မှတ်၊ အခြေခံအရည်အသွေးရှိ ကြောင်းလက်မှတ် (Certificate) စသဖြင့် ပြည်သူလူထုအတွင်း အာမခံပေးဖို့ လုပ်ရတာမျိုးဖြစ်တယ်။ တတိယ တစ်ခုကတော့ အဆင့်သတ်မှတ်ဖို့အတွက် စာမေးပွဲစစ်ဆေးခြင်းပဲ။ နောက်တစ်ခုက ယနေ့ ကျွန်တော်တို့ ကျောင်းတွေမှာ တွေ့ရတဲ့ စဉ်ဆက်မပြတ် အကဲဖြတ်ချည်းကပ်ပြီး အဆင့်သတ်မှတ်ပေးတဲ့ နည်းပဲ။

ဘာရိုးက ပညာရေး မှာ စံအဆင့်အတန်းသတ်မှတ်ခြင်းဟာ မလွဲမသွေရှိရမယ်လို့ မြင်တယ်။ ဒီအတွက် အရည်အသွေး အကဲဖြတ်ခြင်းကို စနစ်တကျတည်ဆောက်ထားဖို့ဟာလည်း ပညာရေးရဲ့ လုပ်ငန်းစဉ်းထဲမှာ အရေးကြီးတဲ့ အရာပဲ။ ဘာရိုးရဲ့ အရည်အသွေးအကဲဖြတ်ခြင်း လေးခုမှာ စိတ်ဝင်စားစရာကောင်းတာတစ်ခုက ဘွဲ့လက်မှတ်နဲ့ ဆာတီဖီကိတ်ထုတ်ပေးခြင်းပဲ ။

အရည်အသွေးသတ်မှတ်ခြင်းဟာ စာမေးပွဲစစ်ခြင်းလို၊ စဉ်ဆက်မပြတ် အကဲဖြတ်ခြင်းလို အရာမျိုးကို ကြည့်ရင် ဆရာတွေရဲ့ အတ္တမနောတိကိုသာလျှင် မှီခိုရသလို ရှိတယ်။ ဒါပေမယ့် ဘွဲ့လက်မှတ်ဆိုတဲ့ အရာကြောင့် ဆရာချည်းသက်သက်နဲ့ မဆိုင်ဘဲ လူ့အဖွဲ့အစည်းနဲ့ သက်ဆိုင်တဲ့ အရာဖြစ်လာတယ်။

ဘွဲ့လက်မှတ်ကနေ ထုတ်ဖော်ပြနေတဲ့ အရည်အသွေးသတ်မှတ်ချက် ဒီလူဟာ ဘွဲ့လက်မှတ်ပါ ပညာကို တတ်ကျွမ်းတဲ့ အရည်အသွေးရှိ ကြောင်းကို လူ့အဖွဲ့အစည်းအပေါ် အာမခံပေးရတဲ့ သဘောရှိလာတယ်။ အရည်အသွေးအကဲဖြတ်ချက်ပုံစံတွေရဲ့ အဆုံးမှာ ဘွဲ့လက်မှတ်လို အရည်အသွေးအကဲဖြတ်ချက် ပုံစံတစ်ရပ်နဲ့ ပိတ်ထားတာက သက်ဆိုင်ရာ တက္ကသိုလ်ဟာ ဒီလူရဲ့ သက်ဆိုင်ရာ ပညာနဲ့ ပတ်သတ်ပြီး လူ့အဖွဲ့အစည်းကို တာဝန်ယူပါတယ်လို့ ပြောကြားနေတာသာ ဖြစ်တယ်။

ပညာရေးစနစ်က သူတို့ရဲ့ အရည်အသွေးအကဲဖြတ်ပုံအတွက် လူ့အဖွဲ့အစည်းကို တာဝန်ယူပေးရမယ်။ လူ့အဖွဲ့အစည်းက ပညာရေးစနစ်တစ်ခုကနေ ဖော်ထုတ်ပေးလိုက်တဲ့ အရည်အသွေးအကဲဖြတ်ချက်ကို အယုံအကြည်မရှိတော့ဘူး ဆိုရင် အဲဒီပညာရေး ဟာ လူ့အဖွဲ့အစည်းအပေါ် သူတို့ရဲ့ အကဲဖြတ်ပုံအတွက်တာဝန်ယူမပေးနိုင်လို့သာလျင်ဖြစ်မယ်။

သက်ဆိုင်ရာ ပညာရေးရဲ့ အရည်အသွေးအကဲဖြတ်ချက် (၀ါ) ဘွဲ့လက်မှတ်ကို လူ့အဖွဲ့အစည်းက မယုံကြည်တော့ဘူး ဆိုရင် အဲဒီ ပညာရေးစနစ်ဟာ ကျဆုံးတဲ့ ပညာရေးစနစ်ပဲ။ လူ့အဖွဲ့အစည်းထဲမှာပါ ဟန်ချက်မညီမညွတ်နဲ့ အကျပ်အတည်း ဆိုက်လာမှာ သေချာတယ်။

မင်းခက်ရဲ